新聞日期:2022/12/22

新聞出處:公視新聞網

新聞標題:民雄表演藝術中心 展出徐瑞芬瓷仔畫的茶具創作

新聞內容:

世界有名的瓷仔彩繪藝術家-徐瑞芬，對12/17到明年的1/8，佇嘉義民雄表演藝術中心，舉辦回臺十年的瓷仔彩繪創作展，三大展區內底，除了西洋瓷仔以外，閣有運用佇茶具的創意設計，咱做伙來看。

一件一件瓷仔的創作，頂面的彩繪風格攏無仝。瓷仔彩繪藝術家徐瑞芬，對國外轉來台灣了後，共過去佇國外學的瓷仔彩繪的手路，運用佇茶具頂面，佇嘉義縣民雄表演藝術中心舉辦展覽。

瓷器彩繪藝術家 徐瑞芬表示：「你若用深色的茶具來泡茶，你無法度看著茶水媠的所在，其實每一種茶水，IN是會當展現各種無仝的色水」

徐瑞芬轉來台灣十年，捌佇嘉義大學擔任駐校藝術家，嘛去到阿里山茶區研究茶米產業，為著欲予故鄉嘉義的茶米通好佇國際捅頭，伊共瓷仔彩繪創作的手路運用佇傳統泡茶的茶具頂懸。

嘉義縣文觀局長 許有仁表示：「這个茶器，事實上咱拄仔佇現場，攏有看著伊用瓷仔彩繪做茶具來泡茶，其實這佮咱傳統茶文化是無仝，所以阮嘛特別推廣茶文化這方面，嘛試看覓用無仝的方式來呈現」

展覽場內底分做三區，除了西洋式的瓷仔茶具以外，閣透過空間的設計，共傳統泡茶、藝術氣氛敆做伙，計共展覽50外件作品。遮的作品會展到明年正月初八。